شعر عريان كالوا طاح

كالوطاح

كالو طاح كلتلهم فلا يرتاح

وماترتاح لان سديت اذانك من ضميرك صاح
وهي مزنه ثجيله وعاصف وحالوب
يريدلهن سكف مصبوب موش الواح
ريح امسودنه وبيها المعمره اطيح
وانته اعويت حلفه مليلك سباح
جان الخير وافر والغثيث ايضيع
بس من صفه الحاصل شالك المرواح
بالزرع الجثير اتشيل شوف العين
والنبته الخبيثه اتفوت عالفلاح
ماترتاح ــــــــــــــــــ
من هاج البحر وبعد علينه الكيش
غادرت السفينه وخنت بالملاح
وحشمت العواصف والمطر والريح
لذكرت الربه ولا كلت بيها ارواح
صحبت عمر جانت والعمر دربين
اشو بول الخطوه وماي وجهك طاح
بدلت الكلوب الجانت اتهم بيك
بمسامر لواكه وليل مغنه وراح
ولميت العفن والسكط والممروض
وخاويت الودر والزفر والفاح
ومن دارت الدنيه اوزره وياك الحال
غطو روسهم والداح منهم داح
ماترتاح ــــــــــــــــــــــ
خاف ازهك وفيضا وكشف المستور
وافضح من حركتي اسرار ما تنباح
ماترتاح ــــــــــــــــــــ
لان ندبه بضميرك والجبيل بخيت
والشاره التحركك عمر ما تنزاح
ماترتاح ـــــــــــــــــــــ
ماطول الشمس كل يوم تلبس ثوب
وتلاعب النسمه الرازقي الفواح
ماطول الملح والخبز بي ناموس
وارواح البشر عند البشر تر تاح
ماترتاح ــــــــــــــــــــــ


للشاعر الكبير
عريان سيد خلف